ന്യൂയോര്ക്ക്: കൊളംബിയന് സൂപ്പര് ഫുട്ബോളര് ഹമേഷ് റോഡ്രിഗസിന്റെ ആരോഗ്യം സംബന്ധിച്ചുള്ള ആശങ്കള്ക്കു വിട. മേജര് ലീഗ് സോക്കര് (എംഎല്എസ്) ക്ലബ്ബായ മിനിസോട്ട യുണൈറ്റഡ് എഫ്സിയുടെ താരമായ റോഡ്രിഗസ്, ടീമിന്റെ ട്രെയ്നിംഗ് ഗ്രൗണ്ടില് തിരിച്ചെത്തി.
2026 ഫിഫ ലോകകപ്പിനു മുന്നോടിയായി ഫ്രാന്സിന് എതിരായ രാജ്യാന്തര സൗഹൃദ മത്സരത്തിനിടെയാണ് റോഡ്രിഗസ് അസുഖലക്ഷണങ്ങള് കാണിച്ചത്. കഠിനമായ നിര്ജലീകരണത്തെത്തുടര്ന്ന് മൂന്നു ദിവസം റോഡ്രിഗസ് ആശുപത്രിയിലായിരുന്നു.
സ്പോര്ട്സുമായി ബന്ധമില്ലാത്ത ആരോഗ്യപ്രശ്നമാണ് റോഡ്രിഗസിനെന്ന് ഏപ്രില് രണ്ടിന് കൊളംബിയ ഫുട്ബോള് ഫെഡറേഷന് പുറത്തിറക്കിയ പത്രക്കുറിപ്പില് വ്യക്തമാക്കി. ഇതോടെ താരത്തിനു ഗുരുതര ആരോഗ്യപ്രശ്നമുള്ളതായി കിംവദന്തി പരന്നു.
പേശികള് ക്ഷയിക്കുന്ന റാബ്ഡോമയോളിസിസ് എന്ന ഗുരുതരരോഗമാണ് റോഡ്രിഗസിനെന്നുള്ള റിപ്പോര്ട്ടുകളും ഇതോടെ പ്രത്യക്ഷപ്പെട്ടു. എന്നാല്, എല്ലാ ആശങ്കകള്ക്കും വിരാമമിട്ട് താരം ഇന്നലെ മൈതാനത്ത് എത്തി. ഇതിനു പിന്നാലെ, റാബ്ഡോമയോളിസിസ് രോഗത്തിന്റെ ഒരു ലക്ഷണവും റോഡ്രിഗസിനില്ലെന്ന് മിനിസോട്ട യുണൈറ്റഡ് എഫ്സി പ്രസ്താവിച്ചു.
സ്പാനിഷ് ക്ലബ്ബായ റയല് മാഡ്രിഡിന് ഒപ്പം രണ്ടു തവണ യുവേഫ ചാമ്പ്യന്സ് ലീഗ് കിരീടം സ്വന്തമാക്കിയ താരമാണ് റോഡ്രിഗസ്. ഫെബ്രുവരിയിലാണ് താരം മേജര് ലീഗ് സോക്കറില് എത്തിയത്.
ഫിഫ 2026 ലോകകപ്പിലേക്ക് ഇനി 64 ദിനങ്ങള് മാത്രമുള്ളപ്പോള് റോഡ്രിഗസ് കളത്തില് തിരിച്ചെത്തിയത് കൊളംബിയയ്ക്ക് ആശ്വാസകരമാണ്. ജൂണ് 18ന് ഉസ്ബക്കിസ്ഥാന് എതിരേയാണ് ലോകകപ്പില് കൊളംബിയയുടെ ആദ്യ മത്സരം. ഗ്രൂപ്പ് കെയില് കൊളംബിയയ്ക്കൊപ്പം പോര്ച്ചുഗല്, കോംഗോ ടീമുകളുമുണ്ട്.
Deepika
E-paper LOGIN
LOGIN